Lucknow-ah Akhilesh Yadav an hreng

Uttar Pradesh chief minister hlui leh Samajwadi Party chief Akhilesh Yadav chu nimin khan Lucknow-ah police-in an hreng.

Sorkar laipui farm law thar pathum duh loa nawrh huaihawtna, 'Kissam Yatra'-a tel tum Akhilesh Yadav hi nimin khan Samajwadi Party office bul kawngpui Police-in an dan avangin Vikramaditya Marg, Lucknow-a a chenna in kawtah sit-in-protest a nei a ni. Heta sit-in protest nei tur hian amah thlawptu ṭhenkhatte nen a chenna in bula police barricade dah chu tawn tlang luiin police-te hian an hreng ta a ni. 

Yadav hian thuthar thehdarhtute hnenah, "Farm law thar hi loneitute ṭanpui tur a nih si chuan, engvangin nge indona kawngah a awm si? Engvangin nge sorkar hi rilru thlak thei loa a awm? Loneitute berin he dan hi an duh lo a nih chuan, sorkar chuan a sut leh mai tur a ni," tiin a sawi. 

Samajwadi Party thupuangtu Rajendra Chaudhary chuan an party office kawng dan chu democracy kalh a nih thu sawiin Akhilesh Yadav chu 'Kisan Yatra'-ah sorkarin a tel an hlau niin a sawi. Tharum tel loa duh lohna lantir chu democracy-ah chuan mimal tin dikna chanvo a ni a, sorkar chuan hei hi khauh takin a dodal si a ni, a ti. 

Hetihlai hian police lam chuan Kannauj district majistrate-in rally neih a phal lo tih sawiin, "SP chief Akhilesh Yadav chu Kannauj-ah programme hmang turin kal a tum a, mahse Kannauj district majistrate chuan hemi atan hian phalna a pe lo a ni. Hemi avang hian Vikramaditya Marg-a SP office kawng chu khar a ngai ta a ni," an ti. 

Pathianni khan SP chuan Uttar Pradesh district zawng zawngah loneitute thlawpin rally neih an tum thu an sawi a, Kannauj aṭang hian bulṭan an tum a ni. 

SP hi loneitute'n Bharat Bandh vawiina an huaihawt tur thlawptu party zinga mi an ni a, Congress leh AAP pawhin an thlawp bawk.

Akhilesh Yadav chuan BJP sorkar chu loneitute'n an tuar nasa ber tih sawiin, BJP chuan kum 2022-ah lonei­tute sum lakluh a leta tihpun tiam mah se chutiang chu a thleng dawn lo a ni, a ti.