Kejriwal-a'n a minister a chhan

Delhi Chief Minister Arvind Kejriwal-a chuan law degree lem siamah puh, Law Minister Jitender Singh Tomar chu chhanin, an puhna chungchanga minister insawifiahnaah chuan a lungawi tih a sawi.

Kejriwal chuan, Tomar hian thil dik lo a tih a nih chuan bang tura a ngen ngei tur thu a lo sawi tawh a ni. "Tomar-a chhungte emaw, ṭhian ṭha emaw ka ni lo. Degree lem neia puh a nih chungchangah insawifiah turin ka ti a, a chhanna min pek danah ka lung­awi a, a degree neih hi a dik ngei a nih avangin thiam lohna a nei lo," a ti.

Chief Minister chuan Bihar University aṭanga Tomar-a law degree chungchang Right to Information (RTI) hmanga zawhna chu roll number dik lo hmanga zawh a ni tiin, "Hei hi Tomar hming tihchhiat tumna a ni," tiin a sawi.

Kejriwal chuan, "Media mi ṭhenkhat chuan Aam Aadmi Party (AAP) tih hmingchhiat hi an tum reng a ni," tiin, AAP chungchang chu nasa takin an chinglet a, a hming chhiat theihna tur­in an bei a ni, a ti. Media lamah pawh langtlanga thil kalpui a ngaih thu a sawi bawk.

AAP hruaitu chuan April 22-a Jantar Mantar-a rally an neih ṭuma Rajasthan aṭanga kal, loneitu Gajendra Singh inawhhlum chungchang pawh a sawichhuak leh a, "Gajendra Singh a inawhhlum khan kan rally neihte kha lo titawp vek tur kan ni," tiin, rally an chhunzawm zel chu an tihsual a nih thu a sawi nawn leh.