Obama rawn zin ṭuma sorkar sum sen zat puang duh lo
US President Barack Obama a rawn zin tuma sorkar laipuiin sum a senral zat, RTI hmanga zawhna chu Ministry of External Affairs (MEA) chuan a chhang duh lo.
Mumbai-a activist Anil Galgadi chuan RTI hmangin sorkar laipuiin kumin January thlaa rawn zin, America President leh a ṭhuihruaitu lo thlenna atan a sum sen zat hi a zawt a ni. Mahse MEA chuan he zawhna hi hnawlin, information a dil chu puanzar chi a ni lo a, hei hian ram pahnihte inkungkaih dan thlengin nghawng a nei thei a ni, a ti.
Galgali hian Obama security personnel leh palai a hruaitu thlenna tur pek an nih dan te, an cham chhunga veng tura police dah zat te, security arrangement siam a nih dante a zawt a ni. A zawhna hnawl a ni chu a lawm loh thu sawiin, Galgali chuan BJP chuan thuneihna an chan dawn khan rorelna langtlanga kalpui a, mipuite rintlaka awm an tum thu an tiam a, hei vang hian an thutiam pawh an vawn ngei a phut thu a sawi.
MEA Deputy Chief Protocol Officer Rohit Rathish chuan Galgadi zawhna hi chhangin, India sorkar chuan kumtinin ram hrang hrang aṭangin palai eng emaw zat a thleng a, palai hrang hrangte zin chhan pawh hi a inang vek lo a, sorkar laipuiin a lo dawnsawn dan pawh a inang vek lo a ni, a ti. "Ramdang palaiin min rawn tlawh hi a hlu em em vek a ni. Hetihlaia sorkar laipuiin palai hrang hrangte tana sum a sen dan inang lote lo puanzar hi thil venthawn ngai tak a ni. Hei bakah hian hetiang information kan pekchhuak chuan ramdangte nena inlaichinna kawngah a ṭha lo lamin nghawng pawh a nei thei a ni," a ti.