Nepal-a zin rih lo turin Bihar CM ngen

External Affairs Ministry chuan Bihar Chief Minister Nitish Kumar chu Nepal ram tlawh a tum ṭhulh a, hun remchang danga kal zawk turin a ngen.

Chief Minister Kumar hian Janakpur, Nepal tlawh a tum a, hemi atan hian phalna pawh pek a ni tawh a ni.

Mahse tun hnaiah National Security Adviser Ajit Doval, Foreign Secretary S Jaishankar leh Additional Principal Secretary to the Prime Minister PK Mishra-te'n Nepal hi an tlawh avang­in, Bihar CM tana tlawh hi a la hun rih lo nia ngaiin, foreign ministry chuan a zin hun hi sawn turin a ngen a ni.

Nitish Kumar-a party, Janata Dal (United) chuan an party hotu leh Bihar CM Nitish Kumar-a Nepal-a zin tum ṭhulh tir tum a ni chu sawi­selin, Parliament-ah pawh an lungawi loh thu sawi­chhuah an tum tih an tarlang. JD(U) General Secretary K C Tyagi chuan, "Nitish Kumar-a'n Janakpur, Nepal tlawh a, lirnghing tuarte a tawrhpuina lantir a tum, dan a nih chhan hi sawifiah turin External Affairs Minister Sushma Swaraj kan phut dawn a ni. Nepal sorkar pawhin Kumar zin tum hi dodalna engmah a nei lo," a ti. JD(U) thupuangtu Sanjay Singh chuan sorkar laipui chetdan chuan BJP politics hniam zia a lantir a ni tiin, BJP chuan Nitish Kumar-a'n Nepal a tlawh chuan an party a lar khalh ang tih a hlau a ni, a ti.