Al-Qaida-in an video tharah PM Modi-a hming sawi lang
Al-Qaida Indian wing, al-Qaida in the Indian Subcontinent (AQIS) in May 2-a video a tihchhuahah, Prime Minister Narendra Modi-a hming chu sawilan a ni.
Video hi AQIS publicitiy wing, As-Sahab tihchhuah ani a, a video hmingah hian 'From France to Bangladesh: The Dust Will Never Settle Down' tih vuah a ni. AQIS hotu Maulana Asim Umar-a chuan PM Modi hming chu Muslim laka indo puangah a puh zingah a lamri a ni.
India rama piang, Umar hian World Bank leh IMP policy, drone, Charlie Hebdo chanchinbu, UN charter, official sermon hmanga Muslim-te beih an nih thu a sawi. Hemi rual hian AQIS chuan Bangladesh leh Pakistan-a sakhaw intluktlanna lam hawi thuziaktu leh mithiam eng emaw zat thah an nihnaah a mawhphurtu an nih thu a sawilang bawk.
Al-Qaida hotu Ayaman Al-Zawahiri chuan nikum khan Indian Subcontinent-ah al-Qaida branch thar a din thu hi a lo puang tawh a ni. AQIS hian Indian Subcontinent-ah Islamic rorelna din a, Shiria dan hman a nih theihna tura beih a tum a ni.
AQIS hotu, Maulana Asim Umar chanchin hi hriat tur vak a la awm lo a, report chuan India hmarlama piang niin, kum 1990 chhoah Pakistan ramah a pem niin a tarlang.
PM Modi hian al-Qaida Indian wing din a nih chungchang, nikuma an zawh khan, "He thil hi kan rama Muslim-te laka dik lo taka thiltihsaknaah ka ngai. An duhdan ang apiangin Indian Muslim-te an awm dawn nia an ngaih chuan, an ngai sual hle ang," tiin a lo sawi tawh a ni.