Sorkar laipuiin man tlawm zawkin chana a hralh ṭan

Sorkar laipui chuan purunsen, tomato leh atta te man tlawm zawka a hralh hnuhah, hunpui lo thlenga a man sang tur venna atan chana pawh man tlawmin a hralh ve leh ṭan ta.

Union food and consumer affairs minister Pralhad Joshi chuan nimin khan National Capital Region(NCR)-a Bharat Chana Dal Phase-II hawnna chu Delhi ah a hmang a ni. Sorkar chuan Chana (Chickpea) chu kg ah Rs 70 leh Chana Whole chu Kg ah Rs 58 in a hralh chhuak ṭan. Chana dahṭhat hi ton nuai 3 a nei mek bawk.

Thla eng emaw zat liam ta aṭang khan chana man hi kg ah Rs 95 niin a man san lai berin Rs 120 ah a kai hman a ni. Chana bakah hian sorkar chuan India thar Moong leh Masur dal man chu ti hniamin, Moong dal hi kg ah Rs 107, Moong sabut kg ah Rs 93 leh Masur dal kg ah Rs 89 in Delhi-NCR huam chhungah a pe chhuak a ni.

"India sorkar chuan mipuite a ngaihsak zia lantirna turin, nitin mamawh leh ei turte chu awlsam leh mantlawm zawka a leitute tana chhawp chhuah chu a tum ber a ni" tiin Joshi hian amah kawmtu thuthar lakhawm tute a hrilh. Thla eng emaw zat liam ta aṭang khan sorkar laipui chuan nitin ei leh in atana hman buh, atta, dal, leh purunsen man chu bithliah fel tak a lo siam tawh bawk.

"Tualchhung thil thar tih pun nan, sorkar chuan Minimum Support Price(MSP) chu kum tinin a tih pun bakah Tur, Urad, leh Masur thar chhuah a tawp mai loh nan 2024-2025 huam chhung atan policy duan bik a nei a ni" tiin Joshi chuan a sawi bawk.