Amit Shah leh Omar Abdullah inkawm

Jammu and Kashmir chief minister thar, Omar Abdullah chuan Nilaini zan khan union home minister, Amit Shah chu Delhi-a a chenna inah a kawm.

Omar Abdullah leh Amit Shah-te hi darkar chanve vel inkawmin, J&K tana statehood pek kir chungchangte an sawidun. Shah chuan J&K-a Abdullah kaihhruai sorkar thar chu sorkar laipuiin a thlawp zel dawn tih hrilhin, statehood pek kir leh tur chungchangah pawh an thawk dun zel dawn tih a sawi.

J&K sorkar thar lak luh a nih hnua cabinet meeting hmasa ber, kar liam taa neihah statehood pek kir leh phutna resolution an lo pass tawh a ni.

CM Abdullah hian prime minister Narendra Modi pawh hmuin, resolution copy hi a pe dawn a ni. State puitlinga dah leh bakah, J&K leilung fate dikna chanvo humhalh sak tura phutna te pawh resulution-ah hian an ziak tel.

Chief Minister chuan sorkar laipui nena inbakkaih chu a duh lo tih sawiin, J&K-a rorelna ṭha leh hmasawnna a awm theihna tura thawhhona ṭha tak neih zel a duh thu a sawi.