Germany Chancellor Scholz leh PM Modi inkawm

Germany Chancellor Olaf Scholz chu Ningnani zanlai khan ni thum chhung cham turin India a rawn thleng. Nimin khan prime minister Narendra Modi nen inkawmin, ram pahnihte inlaichinna tih nghet dan turte an sawi dun.

Olaf Scholz hi union minister for home affairs, Nityanand Rai chuan a lo dawngsawng a, minister pangain an rawn zui a ni.

Ram pahnih hruaitute hi nimin khan Modi chenna, New Delhi-a Lok Kalyan Marg-ah an inkawm a, India-Germany inṭhianṭhatna tih ngheh zelna atan thil pawimawh tak tak an sawi dun tih Scholz chuan a sawi. Tunlai khawvel boruakah India leh Germany anga inṭhianṭha leh thawk dun ṭha chu kan mamawh a ni, tiin X ah a sawilang bawk.

Meeting an neih zawhah Scholz leh Modi hian 18th Asia Pacific Conference of German Business (APK 2024) chu hawngin thu an sawi a, hei bakah Hyderabad House-ah 7th Intergovernmental Consultations (IGC) chu an kaihruai dawn bawk. IGC hi kum hnih dana neih niin, May 2022 khan Berlin-ah neih a lo ni tawh a ni.

German cabinet chuan "Focus on India" tih chu tun hnai khan duang tharin, hei hi ram pahnihte thawh dunna tih chakna tura an duan a ni. Scholz chuan an ram university hrang hranga foreign zirlai awm tam ber chu India mi an nih thu sawiin, nikum chhung pawh khan Germany-a India mi hna thawka awm mi 23,000 an tlin thu a sawi. Germany rama kal turte tana visa dil chungchang pawh rang zawka buaipui a nih theihna turin digitalise vek a ni tih a sawi bawk.

PM Modi pawhin German cabinet ten India nen a thawh dunna ti chak thei tur thil an duang chu lawmawm a tih thu sawiin,"Kumin hi Germany nena kum 25 kan thawh dunna tur niin kum 25 dang lo la awm tur ah pawh thawh dunna hi kan la kalpui zel ang. India ṭhanlenna tur 'roadmap' pawh kum 25 lo la awm leh tur atan peihsa vek a ni tawh" tiin a sawi.

EU bloc-ah Germany hi India-in insumdawn tawnna kawngah a thawhpui pawimawh tak a ni. Kum 2023-24 chhunga Germany rama bungrua a thawn luh hi USD tld 10 hu tlingin, Germany aṭanga lak luh hi USD tld 16.7 atling bawk.