MGNREGS hnuaia thawktu nuai 84.4 paih an ni

Lib Tech-in an zirchianna an tih chhuah thar bera a landanin, kumin April-September chhung khan Mahatma Gandhi National Rural Employment Guarantee Scheme (MGNREGS) hnuaia hna thawktu nuai 84.8 lai te chu he programme aṭangin an hming paih a ni. Hetih lai hian thawktu thar nuai 45.4 dah belh an awm thung.

Report-in a tarlan danin, MGNREGS hnuaia thawktu vaibelchhe riat chuang chu hming ziahna aṭang hian 2022-2023 leh 2023-2024 chhung khan paih an ni. He thil thleng vang hian rampumah hna thawktu vaibelche 6.7 chuang te chu rural job scheme hnuaia hna thawk thei lo dinhmunah an ding a, hei hi Aadhaar-based Payment System (ABPS) tih ngei ngei tur an tih loh vang te a ni hlawm.

ABPS hi sorkar laipuiin rampum huapa hman turin January 2023 khan a tlangzarh a, hmang thei nghal lo te tan pawh in ziah luh hun hnuhnung ber tur hi vawi eng emaw zat chuang pawhsei a ni. January 1, 2024 aṭangin neih ngei ngei ngai tih ni mah se tam takin an la hmang lo tih tarlan a ni bawk.

Assam chu ABPS hmang hnathawktu tam lamah percentage sang ber niin, hetih lai hian Kerala chu ABPS hmang thei tura in ziaklut zinga percentage hniam ber an ni thung.

MGNREGS hnuaia hna thawh tur hi tlahniamin, nikum lamah khan hna thawh tur hi vaibelchhe 184 aṭangin kuminah vaibelchhe 154 ah a tla hniam a, a tlakhniamna hi 16.6% a tling. Tamil Nadu leh Odisha-ah a mipakhat hna thawh theih zat chu tlahniam nasa berin, Maharashtra leh Himachal Pradesh ah erawh a pung thung.

MGNREGS hnuaia thawktu bante hi Lib Tech report chuan 'Diklo taka ban' nia sawi niin," Lib Tech India in zirchianna a neih a, Andhra Pradesh-a an hmuh chhuah chu heng hming paih zinga 15% vel chu dik lo taka paih a ni" tiin Lib Tech report ziaktu member pathum Chakradhar Buddha, Shamala Kittane leh Rahul Mukkera te chuan an sawi.