J&K ah helpawlte bihrukna hmun luhchhuah

Indian Army Romeo Force leh Special Operation Group(SOG) te thawkdun chuan Inrinni khan Jammu and Kashmir-a Bolnai Sector-a Poonch hmunah rawlrala che ṭhinte tawmbuk an luh chhuah. Helpawl tawmbukah hian grenades leh Pakistan mines pathum an man.

Sipai leh an thawhpuite hian Tangmarg leh Jammu and Kashmir huam chhung ah helpawl hnu chhui hna hi an thawk a ni. Hei hi Kashmir hmarlam, Gulmarg beihna thleng an bawhzuina kal zel a ni.

J&K Lieutenant Governor Manoj Sinha chuan kar liam ta Nilaini khan police-te chu project liantham thawhna hmunahte venhim hna hi khauh zawka thawk turin a lo chah tawh a ni. Infrastructure project-ah security audit nei tura a tih bakah hmun him lo laiah te night patrolling leh area domination te nei turin a lo chah tawh bawk.

Counter-Intelligence Kashmir (CIK) chuan operation lian tham chu district parukah neiin helpawl din thar 'Tehreek Labaik Ya Muslim(TLM)' in an pawl mi lakluhna tura duan te chu tih chhiat a nih thu an sawi. CIK hian Srinagar, Ganderbal, Pulwama, Anantnag, Budgam, leh Kulgam district ah te hian beihpui an thlak tih a tarlang.