Punjab-a thil thlengin Parliament inkhawm tibuai

Nimina Parliament in hnih inkhawmah kar hmasaa Moga, Punjab-a hmeichhe tleirawl pakhat, mipat hmeichhiat lam hawia mawi loa taka khawih leh, bus aṭanga paihchhuah a nih hnua a hliam tuar loa a thih chung­chang sawichhuah a ni a, eptu member-te au beng­chhen avangin inkhawm tihtawp lailawk a ni.

Lok Sabha-ah chuan Congress party-in Question Hour hmang lo a, Punjab state-a thil thleng chung­chang sawiho an phutna chu Speaker Sumitra Mahajan chuan a hnawlsak a, hei vang hian eptu member-te chu lungawi loin an aubuai zui ta a ni.

Lok Sabha-aCongress Deputy Leader leh Punjab Chief Minister hlui, Capt. Amarinder Singh chuan, "Punjab-ah dan leh thupek dinhmun a tlachhe tawh a ni. Akali Dal leh BJP ṭangrual sorkar chuan ro a rel thei tawh lo a, hei vang hian President rule puang turin kan phut a ni," a ti.

Rajya Sabha-ah pawh Communist hruaitu Sitaram Yechury-a'n Punjab-a thil thleng chungchang hi sawichhuakin, Punjab-a Akali Dal minister-in he thil thleng hi Pathian remruat a ni tia a sawi chu a dem thu leh, he thu sawitu minister hi ban nghal tura a phut thu a sawi. Kut tuartu hmeichhe tleirawl a thih hnuah hmanhmawh taka halral a nih dan chu a dem thu a sawilang bawk.

Moga-a pawikhawihna thlenna bus hi Punjab Chief Minister Parkash Singh Badal chhungkaw company, Orbit Aviation ta a ni. Bus chhungah hian hmeichhe tleirawl, kum 14 mi chu khawih a nih hnuin bus tlanlai aṭangin paihchhuah a ni a, a nu pawh bus aṭang hian paihchhuah niin hliam na tak a tuar bawk.

Pawikhawihna thleng vang hian bus driver, conductor leh cleaner-te chu man an ni tawh a, tualthah thubuai siamsak an ni.