NDRF-te'n Nepal-a an hnathawhna hmun an chhuahsan

Nepal sorkarin an rama lirnghing tuarte chhanchhuah hna thawk tura ramdang aṭanga lutte an hnathawh titawp a, an ram chhuahsan tawh tura a ngen avangin sorkar laipuiin chhanchhuah hna thawk tura a tirh, National Disaster Response Force (NDRF)-te pawhin an hnathawhna hmun an chhuahsan ṭan ta.

Nepal sorkar chuan lirnghing vanga in chimin a delhte nungdama chhanchhuah beiseina a tlem tawh a, hna la awmte chu tualchhung mite'n an thawk thei tawh dawn nia ngaiin, ramdang mi lutte chu kir tawh turin a ngen.

April 25-a lir­nghing na takin Nepal ram a sâwi avanga chhiatna rap­thlak tak a thlen hnu khan, chhanchhuah leh chhawm­dawl hna thawktu, mi 4,500 vel chu ram 34 aṭangin tirh luh an ni. An zinga a tam zawk hi Kathmandu Valley, Sindhupalchowk leh Gorkha district-ah dah an ni. Sorkar laipui chuan chhanchhuah hna thawktute hi lakchhuah ni mah se, Nepal sorkarin a mamawh chuan puih zel a inhuam thu a hrilh.

Nepal Prime Minister Sushil Koirala chuan an ramin chhiatna rapthlak tak a tawhah India-in a puih danah lawmawm a tih thu leh, India laka bat tam tak an neih thu kar kalta khan a sawi. "India puihna avanga kan lawmzia hi thuin ka sawichhuak zo lo a ni," a ti. Chhiatna rapthlak tak a thlen aṭanga darkar ruk chhungin, sor­kar laipui chuan Nepal pui tur hian National Disaster Response Force (NDRF) rescue team leh chhawmdawlna hmanrua phurtu Air force thlawhtheihna chu Kathmandu-ah a tir hman a ni.

Lirnghing tuarte ṭanpui tur hian IAF flight 32 hmangin chhawmdawlna hmanrua- puan in, blanket, damdawi, bungbel, ei tur, tui thianghlim, engineering equipment, ambulance, oxygen generator ton 520 thawnluh a nih bakah, medical team 18-te'n army field hospital puitling pahnih an siam a, army engineering team 18 leh NDRF team 16 tirh luh an ni bawk.