Lakhvi hi pawisawilo a ni: Hafiz Saeed

Pakistan firfiak pawl, Jamaat-ud-Dawa hotu Hafiz Saed chuan kum 2008-a Mumbai khawpui beihnaa a ruahmantu bera puh, Lashkar-e-Taiba (LeT) hruaitu Zakiur Rehman Lakhvi chu pawisawilo a ni, a ti a, India chuan UN Leh US kaltlangin Lakhvi hrem tur hian Pakis­tan a nawr a ni, a ti.

Saeed chuan, "India hian Lakhvi hi pawikhawihnaa hian a inhnamhnawih a ni tih finfiahna a nei lo. Heti chung hian United Nations leh US lamah zualkoin, Pakistan sorkar chu Lakhvi hrem a nih theihna atan a nawrtir a ni. India leh UN hian Pakistan judicial system-a inrawlh turin dikna an nei lo. Tunhma lam pawhin India hian Pakistan court thutlukna hi a pawmsak ngai lo," tiin a sawi.

Kum 2008, November 26-a Mumbai khawpui beihnaah khan mi 166 an thi a ni. He thil thleng rua­hmantu leh pawikhawihtua puhin Lakhvi leh midang parukte chu thubuai siamsak an nih hnuah man an ni. An thubuai hi kum 2009 aṭang khan ngaihtuah a ni a, mahse kumin April 9 khan Pakistan court chuan Lakhvi puhnaah hian fin­fiahna ṭha tawk a awm lo tiin, jail aṭangin a chhuah a, hei hi India bakah ramdang eng emaw zatin an sawisel.

Sorkar laipui chuan pawi­khawihna rapthlak tak ruahmantu bera puh, Lakhvi chhuah zalen a nih chungchang hi United Nations-ah a thlen a, UN Security Council chuan meeting a neih leh hmasak berah ngaihtuah a lo tiam.