Nakkumah chhiarpui neih beisei a ni

Prime minister Narendra Modi kaihhruai, National Democratic Alliance (NDA) sorkar chuan nakkum, kum 2025 hian ram pum huapa mihring chhiarpui, population census a buatsaih tawh dawn nia sawi a ni. Chhiarpui hi kum 2026-ah zawh fel tum a ni.

Chhiarpui neih zawhah hian ram pum huap vekin Lok Sabha constituency siamremna kalpui a ni dawn a, kum 2028 ah zawh fel theih beisei a ni bawk.

Kum 10 dana neih ṭhin, population census hi kum 2021 khan ṭan tura ruahman a ni a, mahse Covid-19 hri leng thawh hnihna thleng leh avang khan kalpui theih a ni ta lo. Sorkar chuan tunah rih chuan chhiarpui neihna tur ruahmanna hi a awm lo niin a sawi thung.

Chhiarpui neih hnuhnung ber chu kum 2011 daih tawh kha niin, hemi hnu hian political party hrang hrangin buatsaih turin phut ṭhin mah se neih chhunzawm a la ni lo.

Kum 1881 aṭang khan India hian kum 10 danah chhiarpui hi a nei ṭhin a, chhiarpui hnuhnung ber, kum 2011-ah khan India rama mihring cheng zat chu vaibelchhe 121.1 a ni. Mipa awm zat hi 51.5% (vbc 62.32) niin hmeichhia 48.5% (vbc 58.77) an ni. Chhiarpui hmasa ber, 2001 aṭanga 2011 inkarah hian India ram mihring punna hi vbc 18.1 a tling a, growth rate hi 17.64% a ni. 2011 chhiarpuiah hian India rama cheng zinga 79.8% chu Hindu sakhaw zuitu niin, Muslim hi 14.2%, Kristian 2.3%, Sikhs 1.7%, Buddhist 0.7%, Jains 0.4% leh sakhaw dang zuitu 0.9% an awm.

Kum 2020, April 1 kha chhiarpui neih leh hun a ni a, mahse Covid-19 hri leng vangin tihkhawtlai a ni a, tun thlengin buatsaih a la ni ta lo a ni. United Nations-in April, 2023 report a tih chhuahah chhiarpui hnuhnung ber, kum 2011 aṭanga report tih chhuah thleng khan India mipuite tam lam chuan China a pel tawh niin a chhut a, India rama mihring awm zat chu mi vaibelchhe 142 chuang, (1,425,775,850) niin a chhut a ni.