J&K ah helpawl nen inkahna thleng

Jammu and Kashmir-a Line of Control(LoC) bul mai, Akhnoor sector huam chhungah nimin khan sipai leh Pakistan ramri aṭanga Jammu-a lut ru nia hriat, helpawl an inkap.

Bhattal huama Khour hmunah sipai ambulance kawngpuia tlan lai chu helpawl mi pathumin lo kapin, sipaite hian an chhang let ve nghal a ni. An inkahna hi Jogwan-a Assan temple bulah niin, thi leh hliam an awm lo nia hriat a ni.

Official-te chuan helte hi temple ah hian inkhuarin, mobile phone hmanga midang biak an tum lai hian an lam pan ambulance chu hmu in an lo kap niin an sawi. Sipai leh an bula police te chuan rang taka bei letin hel pathumte hi an relh bo zui a, zawn hna hi an thawk zui mek a ni.