Rozgar Mela-ah PM-in appointment letter 51,000 sem

Prime minister Narendra Modi chuan nimin Thawhlehni khan Rozgar Mela hnuaia hna hrang hrang thawk tur lak tharte appointment letter 51,000 chuang chu virtual hmangin a sem.

PM Modi hian nimin vek khan Ayushman Bharat Pradhan Mantri Jan Arogya Yojana (ABPMJAT) hnuaia kum upa lam, kum 70 leh a chunglam te tan healthcare sum hman theih tih zauhna hun a hmang nghal bawk.

Modi chuan video conference kaltlangin hun a hmannaah hian ṭhalaite dinhmun chawikan a ngaih pawimawh zia te, ram dinna kawnga tha an thawh theihna tura awmze nei taka thuam chak zel a tum dante a sawi.

Rozgar Mela hi nimin khan ram chhung hmun 40-ah buatsaih niin, hemi kal tlang hian ministry leh department hrang hrang - department of revenue, ministry of home affairs, ministry of defence, ministry of health and family welfare, leh department of higher education hnuaiahte ṭhalai sang telin hna thar hi an zawm dawn a ni. Hna thawk tura lak tharte hian online module, ‘Karmayogi Prarambh,’ kaltlangin foundational trainign an nei dawn bawk a, e-learning course 1400 zet a awm a ni.

PM hian kum 70 leh a chunglam te tana duan healthcare scheme Ayushman Bharat Pradhan Mantri Jan Arogya Yojana (ABPMJAT) huang zauhna tlangzarhna hun chu Ayurveda Day denchhenin a hmang nghal bawk. Hei hi kum upa zawkten he scheme kaltlanga in enkawlna senso an neih vena niin, anmahni pualin kum khat atan Rs nuai 5 an nei thei dawn a ni. An chhungkaw member dang ten an hman ṭawm ve thei lo thung.