Ni 15 chhung thlawhtheihna 140 in tihṭhaihna tawk

India ram chhunga thlawhtheihna thlawk chhuak tur hrang hrang te chuan ni eng emaw zat liam ta aṭang khan bomb leh puakthei thil phur anga tihṭhaihna an tawk fo. Thawhṭanni pawh khan thlawhtheihna 60 chuang in bomb phur anga tihṭhaihna hi tawk lehin, ni 15 chhungin ramchhung leh rampawna thlawk tur thlawhtheihna 410 chuang in tihṭhaihna an tawk tawh.

Air India leh IndiGo thlawhtheihna 21 ve ve leh Vistara thlawhtheihna 20 te chuan Thawhṭanni khan bomb leh puakthei thil phur anga tih ṭhaihna hi an tawk leh. "Inkaihhruaina duansa awm angin thuneitu sangte hnenah rang taka hriattirin, venhimna duan khauh tak chu kenkawh nghal a ni," tiin an tarlang.

Hetih lai hian Maharashtra-a Nagpur police-te bomb phur anga intihderna thlen ṭhintu ber nia hriat chu an hrechhuak. Police-te chuan an mi hriatchhuah hi kum 35 mi, Gondia a cheng Jagdish Uikey niin an tarlang. Nagpur Police special branch chuan Uikey hi terrorism chungchang lehkhabu ziaktu niin kum 2021 khan man a lo ni tawh tih an tarlang bawk. Uikey hian email hmangin inbumna hi a thawn chhuak ṭhin a ni.

Uikey hian sorkar mi pawimawh hrang hrang pawh email a lo thawn tawh a, an zingah hian Prime Minister Office, Railway Minister, Maharashtra chief minister Eknath Sinde leh a deputy bakah airline office, Director General of Police (DGP) leh Railway Protection Force (RPF) te pawh an tel niin official chuan a sawi. Uikey hi a thiltihte hriatchhuah ni tawh mah se a chin hriat a ni lo a, a bibo mek niin thuneitute chuan an sawi. Man a nih thuai theih nan a zawng turin special team din a ni tih pawh an sawi bawk.