Salman Khan kum nga táng tura hrem a ni

Lemchan thiam, Salman Khan chu kum 2002-a car-a mi a sut thubuaiah nimin khan Mumbai-a session court chuan thiam loh a chantir a, kum nga lung-in tang turin a hrem. Car-in a sut vang hian mi pakhat a thi a, midang pali-in hliam an tuar.

Justice DW Deshpande chuan Bollywood actor hi an puhna thubuai hrang hrangah thiam loh chantirin, accident a thlen laia amahin motor khalh loin a driver Ashok Singh-a zawkin a khalh nia a sawi pawh a hnawlsak. Salman-a lakah hian IPS section 304 party II, section 279, 337 leh 338, 427 bakah Motor Vehicle Act Section 34 (a) leh (b), 181 leh 185 hnuaiah thubuai siamsak a ni.

Justice Deshpande chuan, 'Nangmah ngeiin car hi i khalh a ni' tiin, Salman Khan chu hetih­lai hian zu a in a, licence tel loin motor hi a khalh bawk tih a sawi.

Kum 2002, September 27 zan khan Hill Road, Bandra-a American Express Laundry pannaah Salman Khan-a Toyota Land Cruiser hi tlanchhoin, kawng sira awmte chu a su a, mi pakhat thiin midang pali-in hliam an tuar. Khan hi man ni mah se, medical check up neih hnuah chhuahtir leh nghal a ni. Kum 2002, October thla khan man nawn leh ni mah se, session court-in bail in a chhuahtir leh nghal.

Salman Khan-a ukilte chuan Bombay High Court-ah bail-a chhuah dilna an thehlut nghal a, nimin tlai khan ngaihtuah a ni. Kum thum aia tam tang tura hrem a nih avangin bail dilna hi High Court-ah a dil a ngai a ni. Court-in a dilna hi a pawm loh chuan Mumbai-a Arthur Road Jail-ah tantir a ni ang.

Petition thehluttu, lawyer Abha Singh chuan rorelna dik hlenchhuah a ni ta chu lawm­awm a tih thu sawiin, court thutlukna siam chuan India ram chu mi hausa leh thiltitheite'n tual that a, zalen taka an awmzui theihna ram nia ngaihna chu a thaibo ta a ni, a ti.