Land Bill dodalna lantir leh

Central-a BJP kaih­hruai NDA sorkarin land bill siam danglam a tumna chu duhloin, Thawhlehni khan Left party, farmer's union leh civil society organisation-te chuan inthurualin lungawi lohna an lantir leh.

'Bhumi Adhikaar Andolan' tih hmangin nawrh hi huaihawt a ni a, sorkarin land bill siam danglam a tumna chu loneitute duhsak lohna a ni tiin, sorkar chu a siam danglam tumna sut turin an phut.

Bill siam danglamna tur, Right to Fair Compensation and Transparency in Land Acquisition, Rehabilitation and Resettlement Act, 2013 hi March 10 khan Lok Sabha-ah pass a ni tawh a, Rajya Sabha-ah ngaihtuah leh a ni ang.

Nawrh huaihawtnaah hian hmun hrang hrang aṭangin loneitute mi tam tak an pungkhawm a, loneitute duhsakna lam hawi policy siam a, loneitute venghimna dan siam turin an phut a ni.

National Alliance of People's Movement hotu, Medha Patkar chuan sorkar­in land ordinance a siam chu nawrna avangin tidang­lam ṭhen tawh mah se, project siamna tura loneitute ram laksak a nih dan tur chung­chang erawh a thlak dang­lam lo niin a sawi.

Communist Party of India hruaitu leh Rajya Sabha member, R.Raja chuan Land Bill hi Rajya Sabha-a pharh a nih hunah an dodal zel dawn tih a sawi. CPI(M) general secretary, Sitaram Yechury pawhin Land Bill hian loneitute dinhmun tihchhiat sak an nih mai bakah, an thlai tharchhuah thlengin a nghawng dawn a ni, a ti.