Sonia Gandhi-in mi pakhat sorkarah NDA a puh

Congress President Sonia Gandhi chuan Prime Minister Narendra Modi-a kaihhruai sorkar chu beiin, kum khat thuneihna a chan chhungin chhinchhiah tlak eng thil mah a la thawk lo a ni, a ti.

Central-a NDA sorkar chu mi pakhat sorkar a ni tiin, Sonia Gandhi chuan thuneihna zawng zawng chu Prime Minister Office kutah a awm a, minister dangte chuan thuneihna tak tak an nei ve lo niin a sawi.

Sonia Gandhi chuan PM Modi-a'n ramdang a tlawhnaa sorkar hmasate a sawisel vak vak ṭhin chungchang pawh sawichhuakin, "Rampawn lamah kan ram ngei chu sawisel a ni a, hei hi a thlen vawikhatna a ni," a ti.

"Mahatma Gandhi tihlumtu pawh fakin a awm a ni' tiin Sonia chuan BJP kaihhruai NDA chu a bei a, hei hi BJP hruai­tu ṭhenkhatin Mahatma Gandhi thattu, Nathuram Godse fakna thu an sawi­chhuah vang a ni.