MHA-in pawisa thawn chungchangah fimkhur turin chah

Union Ministry of Home Affairs(MHA) hnuaia Indian Cyber Crime Coordination Centre (I4C) chuan Thawhlehni khan thuchhuah siamin,pawisa inthawn ngai thilah inbumna a tam ṭhin avangin fimkhur thar turin mipui a chah.

14C hian Gujarat leh Andhra Pradesh police-ten bank account lem siam hmanga pawisa inthawnte an hmuh chhuah hnuah he hriattirna hi a ti chhuak a ni.

Official-te chuan an thil chhuina aṭang hian India baka ram pawn thleng aṭang pawhin, account lem emaw, mi dang account an hawh sak emaw hmangin dan loin pawisa inpekna tur, digital gatesway hi an siam niin an sawi. Social media kaltlanga current leh saving accounts an chhui chiante chu shell company bakah enterprise leh mimal te account te a lo ni tlangpui niin MHA chuan a sawi.

" Heng account lem an siamte hi ram pawn lam aṭangin an rawn enkawl a ni. Inbumna hrang hrang - investment lem, pawisa inchawi leh pawisa khelhna website bakah stock trading platform te an siam a, heng account hmanga pawisa an dawn rualin rang takin thubuai ziah a nih hma in hmun dangah thawn a ni leh ṭhin " tiin a tarlang. Chhui chianna neih aṭang hian pawisa pektirna atana an hmante hi PeacePay, RTX Pay, PoccoPay, RPPay te niin, a dang hriat loh pawh a awm niin an tarlang bawk.