Nau piang leh mitthi ziah luhna Mobile App tlangzarh

Union home minister Amit Shah chuan October 29, 2024, Thawhlehni khan Civil Registration System(CRS) mobile application chu tlangzarhin, he mobile app hi nau piang leh mitthi ziah luhna tur a ni. Minister hian Delhi-a Census Building-ah Sardar Vallabhbhai Patel lim a hawng nghal bawk.

Amit Shah chuan CRS-ah hian mipuite tan, khawi hmun aṭang pawhin nau piang thar leh mitthi an ziak lut thei dawn tih sawiin, mobile application siam hian registration tihna tura hun tam tak senral ngai ṭhin chu a ti tlem dawn a ni, a ti.

Registration of Births and Deaths (Amendment) Act, 2023, in a phut angin October 1,2023 hnu lama nau piang leh mitthi zawng zawng ziah luh te chu digital vekin central portal dc.crsorgi.gov.in- ahte ziah luh tur a ni. He app kaltlanga digital birth certificate pek chu service hrang hrang - zirna ina admission tihna tur, sorkar hna leh inneih registration atan hman theih a ni ang.

Sorkar laipuiin data a lakkhawm hmang hian National Population Register(NPR) hnuaia ration card, thilneih ziahluh leh electoral rolls a lo update nghal zel dawn a ni. NPR data hi kum 2010 khan in tinah kala lakkhawm niin, chhungkua vaibelchhe 119 chuang ziah luh tawh an ni. NPR hi Citizenship Act siam na tur atana kawng pawimawh tak pakhat a ni bawk.