Sorkar laipuiin Ramdang mi luh phal
Ministry of Home and External Affairs chuan nimin khan thuchhuah siamin Covid-19 hripui leng vanga visa a khuahkhirhna a siam chu a thlahdul a, ramdang mi zawng zawng khualzin (tourist) ni lote chu India rama luh a phal.
Sorkar laipui chuan Overseas Citizen of India (OCI), Person of Indian Origin (PIO) card holder-te leh ramdang mi reng reng chu ramchhunga an luh a phalsak ta a ni. Nimina thuchhuah an siam hma kha chuan OCI card nei ṭhenkhat chiah India ramah an luh an phal a ni.
"India chhuahsan emaw luh emaw duhte tan sorkar chuan khuahkhirhna visa leh zin chungchanga a lo siam tawh chu ramdang mi category tam zawk tan leh India mite tan pawh a thlahdul a ni. Chumi vang chuan OCI leh PCI card holder zawng zawngte bakah ramdang mi engvang pawha India ram tlawh duhte chu phalna pek an ni tawh dawn a, mahse hei hian tourist visa erawh a la huam ve lo ang," tiin MHA chuan thuchhuah an siamah an tarlang.
MHA chuan OCI leh PIO card holder-te leh ramdang mi hrang hrangte chuan van lam emaw tui lam emaw inkalpawhna hmangin India ram an lut thei tawh tih an tarlang a, mahse chung mite chuan inkhunghran emaw Covid-19 chungchangah emaw Ministry of Health and Family Welfare inkaihhruaina dan an zawm a ngai a ni, a ti thung.
Inthlahdulna dan thar hnuaiah hian sorkar laipui chuan visa awm sa zawng zawng chu a rang thei ang bera tihnun leh turin thutlukna an siam bawk a, mahse hei hian electronic visa, tourist visa leh medical visa a huam dawn lo.
Sorkar laipui hian March 11 aṭang khan visa zawng zawng a titawp vek a, naupang kum tling lo, an nu emaw an pa emaw, khawi emaw zawk zawk India khua leh tui emaw OCI card holder-te chu June aṭang khan India ramah an luh a phal sak.
Ramdang mi, India mi nupui pasala nei emaw, ramdang mi an fate India passport nei site emaw OCI card neite emaw pawh ramchhunga an luh a phal sak bawk. Mahse tunah chuan khuahkhirhna hi thlahdulin ramdang mite chu tourist visa hmang an nih loh chuan India ramah an rawn lut thei dawn ta a ni.