Bihar-ah BJP-in a thlawna Covid-19 vaccine pek tiam

Bihar Legislative Assembly inthlan thawh khatna chu October 28 hian neih a ni tawh dawn a, inthlan neih tur pual hian BJP chuan nimin khan manifesto tlangzarhin, an sorkar chuan Bihar mipuite tan a thlawna Covid-19 vaccine pek an tiam.

Party manifesto hi union finance minister leh BJP hruaitu Nirmala Sitharaman-i'n a tlangzarh a, Covid-19 vaccine chu mipuite hman theih tura siam chhuah a nih hunah Bihar mipuite chuan a thlawnin an dawng vek dawn a ni, a ti. 

Assembly inthlan neih turah hian BJP chuan National Democratic Alliance (NDA) hnuaia a thawhpui, Nitish Kumar-a party Janata Dal (United) party a thawhpui leh dawn a ni. Member 243 awmna assembly-ah JD(U) hian seat 122-ah chuhin, BJP hian seat 121-ah a chuh ve thung ang. Eptu ṭangrual pawl, Rastriya Janata Dal (RJD), Congress party leh Left Party-te intelkhawm, Mahagathbandhan chuan an manifesto an tlangzarh tawh bawk. 

Eptu party-te chuan BJP mani­festo-a Covid-19 vaccine a thlawna sem an tiamna chu an sawisel zui nghal. Khawvel ram hrang hrangah, India pawh telin coronavirus vaccine siamin an intlansiak mek a, hetihlai hian Bihar-ah chauh hian inthlan thutiamah he vaccine hi hman a la ni, an ti. 

Aam Admi Party (AAP) hotu Arvind Kejriwal chuan "BJP sorkarna ni lo state te engtinge ni ang? India mi ni tho, BJP vote lote chuan Covid vaccine a thlawnin an dawng ve thei dawn lo em ni?" tiin a ti el. Congress MP leh union miniser hlui  Sashi Tharoor pawhin, "Min vote ula, vaccine ka pe ang che u.." tia minister thusawi chu Election Commission chuan a ngaihven zui dawn em tiin a zawt zui bawk. 

Inthlan hi thawh thuma neih a ni dawn a, October 28-ah a thawh khatna neiin, November 3 leh 7-ah neih leh a ni dawn a, November 10-ah result puan a ni ang.