Leh-ah Analog Space Mission tlangzarh

Indian Space Research Organization(ISRO) chuan nimin, Zirtawpni khan analog space mission hmasa ber chu Leh, Ladakh-ah tlangzarh a ni tih a puang.

He mission hi van thengreng dinhmun zirchianna tur leh, hmalam huna van boruaka zin lehna tur chungchang zirchianna tura ruahman a ni. In te hampuar theih, Hab-1 ah hian van boruaka thil awmdan zul zuia khawsak theih tura duan a ni. Hab-1 ah hian inthiarna, hydroponics thlai chinna leh choka te a awm tel.

He mission hlawhtlinna tur hian Human Spaceflight Centre, ISRO, AAKA Space Studio, University of Ladakh, IIT Bombay thawk ho in an duan niin, Ladakh Autonomous Hill Development Council chuan a lo pui bawk a ni.

Mission kalpuina tura Ladakh thlan a nihna chhan hi a hmun vawt tak leh a boruak awm dan te, a altitude sangte chu space mission rei tak daih neihna tura technology leh ṭul dangte enchhinna tura boruak ṭha ber nia ngaih a nih vang a ni. Mission neih chhung hian scientist-te chuan technology thar, robot hmanrua, motor, khawsak dan leh inbiakpawh dante thlengin an enchhin ang. Hab-1 hian midang tlawh pawh miah loha mihring awmhran leh khung hranin a hriselna leh a khawsak phungah nghawng a neih dante pawh a zir tel nghal dawn a ni.

India-in Space Vision 2047 a neihah hian kum 2025-a Indian Space Station, Bharatiya Antariksha Station (BAS) leh kum 2040-a Thla leillunga India mi kahkai te a tel.