Salman Khan-a interim bail titawp turin SC-ah an ngen

Lemchan thiam, Salman Khan chu a motor-a kawngsir mi awmte a sut thubuaiah Nilaini khan sessions court judge DW Deshpande chuan thiam loh chantirin kum nga tang turin a hrem. Hremna tur tihchhuah a nih hian Salman Khan chuan Bombay High Court-ah bail-a chhuah dilna a thehlut nghal a, HC chuan vawiin thleng hian interim bail-a chhuah a phalsak a ni.

Bombay High Court-in thiam loh chantir a nih hnu lawka interim bail a pe nghal chu lungawi loin, MNS hruaitu leh advocate Akhilesh Chaube chuan Supreme Court-ah nimin khan interim bail pek hi sut turin a ngen.

High Court hian Salman Khan bail dilna hi vawiin hian a ngaihtuah dawn a, vawiin hi annual summer vacation a neih hmaa hnathawh ni hnuhnung ber a ni a, June 7-ah hawn leh chauh a ni ang. Nilaini khan HC hian Salman-a ukil, Harish Salve-a'n hrisel loh chhuanlama bail a dilna chu a phalsak a ni.

Court-in intermin bail a pek hnu hian Salman hi an chhungkaw chenna, Bandra West-a Galaxy Apartments a pan nghal a, he hmun hi kum 2002-a a car-a kawngsira awm mi panga a sutna hmun aṭanga hla lo te a ni. A mi sut zinga mi pakhat hi a thi a, midang pali-in hliam an tuar.

Salman Khan hian Rajasthan-ah thubuai tihkhawtlai pali a la nei mek bawk. Ramsa pel rua puha thiam loh chantir a nihna thubuai pahnih chu a appeal a, hei bakah ramsa pelrua puhna thubuai dang leh licence thih tawh hnua ralthuam kawla puhna thubuai pawh a la nei. Ralthuam kawl chung­changah hian Arms Act hnuaiah thubuai siamsak a ni a, May 14 hian ngaihtuah a ni ang. Thiam loh chantir a nih chuan kum sarih thleng lung-in tantir theih a ni ang.