Rahul-a'n Amethi food park project tihtawp a sawisel

Congress Vice President Rahul Gandhi chuan Prime Minister Narendra Modi-a kaihhruai sorkarin Amethi-a food park project a tihtawp chu sawiselin, he thil hi politics-a phuba an lak tumna a ni, tiin nimina Lok Sabha inkhawmah a sawi.

Lok Sabha inthlanpui neih dawna Modi-a'n ram hmasawnna thlen a lo tiam tawhte sawi­chhuakin, Rahul chuan sorkar laipui thiltih dan hian PM thu tiamte a kalh a ni, a ti.

Congress hruaitu chuan, "Inthlan dawn khan PM hian Amethi bial hi tlawhin minute 52 chhung thu pawh a sawi a ni. Politics chu hmasawnna thlenna tur chauha khelh a tum thu a sawi lai khan min hneh hle a, mahse food park khar hi hmasawnna a ni lo," tiin a sawi. A bial chhunga food park siam chu loneitute puala duan a nih avangin tihtawpna thupek chu sut leh turin PM a ngen nghal bawk.

Amethi Mega Food Park project hi Congress kaihhruai UPA sorkar lai, kum 2013, October thla khan hawn a ni a, cheng vaibelchhe 200 senna tura ruahman a ni. He project hmang hian Uttar Pradesh-ah investment ṭha tak siam theih beisei a ni. Hei bakah hian Amethi leh a chhehvel biala ṭhalai 40,000 velin hna an neih theih phah dawn bawk a ni. Mahse NDA sorkar chuan Shaktiman Food Park siamna tura phalna a pek tawh chu a sut leh a ni.

Union Home Minister Rajnath Singh chuan hemi chung­chang hi ama ngeiin enfiah a tum thu sawiin, loneitute harsatna thlen zawnga eng thil mah a thlen a duh lo thu a sawi. Singh chuan, "Amethi biala food park khar chungchang hi ka enfiah ang. Hei hi politics phuba lakna a ni lo. Keimah ngeiin enfiahin thil awmdan pawh ka hrilh leh ang che," a ti.