Bombay HC-in Salman Khan bail a phalsak

Bombay High Court chuan kum 2002-a a car-a mi pakhat su hlum a, midang pali a sut hliam avanga session court-in kum nga tang tura thiam loh a chantir, lemchan thiam Salman Khan-a bail dilna chu nimin khan a phalsak.

Nilaini khan session court chuan Salman Khan thiam loh chantirin kum nga tang turin a hrem a, mahse hemi ni vek hian Bombay High court chuan ni hnih chhung atan interim bail a pe nghal a ni.

Nimin khan Salman Khan-a bail dilna hi ngaihtuah a ni a, Justice Abhay Thipsay chuan a phalsak ta a ni. Judge chuan Khan hi Trial court-a inlan tur leh, bail bond Rs 30,000 dah turin a ti bawk. Bail-a a chhuah chhung hian rampawn lama a zinchhuah khap a ni a, zin a ṭul a nih pawhin court phalna a lak phawt a ngai ang.

Salman Khan hian thiam loh chantir a nihna hi a appeal nghal bawk a, a appeal na hi June 15 hian ngaihtuah a ni ang.