Nepal-in a mamawh chauh thawn turin India a ngen
Lirnghing vanga chhiatna rapthlak tuartu, Nepal tan India chuan chhawmdawlna tam tham tak a thawn tawh a, hetihlai hian Nepal chuan India hnenah an mamawh ang chi chauh thawn tawh turin a ngen.
Nepal ambassador Deep Kumar Upadhyay chuan Indian agency-te hnenah tui leh thawmhnaw-te chu thawn tawh loin, hei aia mipuite mamawh tarpaulin sheet leh ei tur, dah rei theih chite thawn zawk turin a ngen.
Hetihlai hian lirnghing tuarte chhanchhuah hna thawh mek chu Nepal sipai leh tualchhung mite'n an thawk chhunzawm thei tawhah ngaiin, Nepal sorkar chuan an rama ramdang mi, chhanchhuah hna thawk tura lutte chu haw tawh turin a ngen. Hemi hnu hian India aṭanga chhanchhuah hna thawk tura tirh, National Disaster Response Force (NDRF) mi 780-te pawh koh haw an ni a, Nilaini zan khan an rawn haw kim tawh a ni.