West Bengal-ah Steel plant hawn a ni

West Bengal, Burnpur-a IISCO Steel Plant dinthar leh hmanraw tunlai zawka thuam thar a, cheng vaibelchhe 16,000 senna tur chu Prime Minister Narendra Modi-a'n nimin khan a hawng.

Steel Plant dintharna pual hian vantlang inkhawm buatsaih nghal a ni a, PM chuan thu sawiin, state sorkar hrang hrangte chu sorkar laipui thawhpui a, ram hmasawnna atana 'Team India' anga hma la turin a ngen.

PM chuan sorkar laipuiin ramchhung khawchhak lam bial tihchak a tum a, hemi atan hian West Bengal chu thuam chak hmasak phawt a ngai a ni, a ti.

"Team India hmanga international issue kan neih mek, Indo-Bangla Land Boundary Accord te hi kan chingfel thei a nih chuan, ramchhung buaina ang chu awlsam takin kan chinfel thei dawn a ni," tiin Modi chuan a sawi. Tunhma lamin central leh state-te chuan thawhhona kawngah inhriatthiam tawk lohna leh harsatnate a awm ṭhin a, hei hi thil pawi tak a ni tiin Modi chuan, ramin hma a sawnna turin state tinte chu tha taka thawhpui a tiam.

Modi chuan, "Kei pawh hun rei tak state pakhat chief minister ka lo ni tawh a, central chuan state sorkarte a pui dawn chuang lo tih hawi zawnga rilru kan put ṭhinte pawh ka hrethiam a ni,"tiin, Delhi chauh chu India rama roreltu a ni lo a, pillar dang 30 (state) in an puih a ngai a ni, a ti.

Burnpur-a IISCO Steel Plant hi Steel Authority of India plant panga-na a ni a, kum 1972 khan sorkarin a la a, 1978 khan SAIL kutah dah pumhlum a ni.

Steel plant awmna hi ram acre 953-a zau a ni a, green technology thar ber hmanga thuam changkan a ni a, kum khatah steel ton maktaduai 2.9 siamchhuak thei tura duan a ni.

Hawnna inkhawma tel ve, Unoin Minister for Steel and Mines Narendra Singh Tomar pawhin thu sawiin, West Bengal-a steel plant tihlen leh thuam changkan chuan investment tam zawk a hip lut thei dawn a, hei hian hmasawnna nasa takin a thlen dawn a ni, a ti.