PM-in social security scheme 3 tlangzarh

Prime Minister Narendra Modi chuan kar kalta Inrinni khan social security scheme pathum, Pradhan Mantri Suraksha Beema Yojana, Pradhanmantri Jeevan Jyoti Beema Yojana leh Atal Pension Yojana a tlangzarh.

PM Modi hian social security scheme hi Kolkata-ah a tlangzarh a, hemi rual hian ramchhung hmun 115-ah tlangzarh ve nghal a ni. Modi chuan a kaihhruai sorkarin ram chhunga mi rethei berte pawh in­nghahna tur siamsak a tum zel dawn a ni, a ti.

Modi chuan India khua leh tui tu pawhin life insurance, accident insurance leh pension-a social security an neihna tura hmalak ṭanna a ni tih a sawi.

PRADHAN MANTRI SURAKSHA BIMA YOJANA
* Thla khatah Rs 1 pekin accidental inssurance cheng nuai 2 thleng a tih theih.
* Kum 18-70 inkarate tan a tih theih vek a ni.
* Aadhaar-linked bank account nei chuan bank hnena a form thehlutin he scheme hi an zawm thei.
Prime Minister chuan ramchhunga mi hausate chu mi retheite'n he scheme hi an zawm theihna tura ṭanpui turin a sawm nghal bawk.

PRADHAN MANTRI JEEVAN JYOTI BIMA YOJANA
* He scheme hian natural leh accidental death a huam a, cheng nuai hnih chin pek theih a ni.
* Scheme zawmtu tan kum khatah Rs 330 pek a ngai.
* Kum 18-50 inkar, bank account neite tan he scheme hi zawm theih a ni.
ATAL PENSION YOJANA
* Scheme hian kum 60 chunglamte tan pension a pe ang.
* Scheme zawm thei chu kum 18-40 inkar an ni.
* Pension pek theih zat chu sorkarin a bituk ang.

Swalavalamban Scheme hnuaia awm mekte chu APY-ah hian sawn an ni ang.
Modi chuan scheme pathumte hi June 1 aṭang hman ṭan tur a nih thu sawin, bank-te pawhin heng scheme hnuaiah hian registration pawh an ti ṭan tawh a ni, a ti. Scheme zawm tumtu hi mi vaibelchhe 5 chuang an awm tawh a, an zinga nuai 42-te chu West Bengal amite an ni