Jayalalithaa-i eiruk thubuai hlihsak a ni

Tamil Nadu Chief Minister hlui leh AIADMK hotu lu ber, J Jayalalithaa-i chu a sum lakluh phu loa hausaa puhna thubuaiah nimin khan Karnataka High Court chuan a hlihsak.

Bengaluru trial court chuan Jayalalithaa-i hi eiruk thubuaiah hian thiam loh chantirin, kum li tang tur leh cheng vaibelchhe 100 chawi turin a lo hrem tawh a ni. Hei hi CM hlui hian Karnataka High Court-ah a appeal a, nimin khan court chuan thu­tlukna hi a puang ta a ni.

Jayalalithaa-i chuan a laka thubuai thehluttu, eptu pawl DMK-in amah tihchhiat tumin bei mah se, a tawpah chuan thudik a lang­chhuak ta a ni tiin, a hnehna chan chu a mimal hnehna ni loin, state mipuite tana hnehna a ni, a ti.

AIADMK hotu Jayalalithaa-i leh a thawhpui hnai tak, N Sasikala, VN Sudhakaran leh D Elasvarasi-te chu chief minister a nih lai, kum 1991-96 chhung khan eiruknaa inhnamhnawiha puh an ni. Hemi chhung hian CM hlui hi an lakluhna hriat si loha cheng vaibelchhe 66.64 neiah puh a ni a, nikum September thla khan trial court chuan a thubuaiah hian thiam loh a chantir a ni. Jayalalithaa bakah midang pathumte hi cheng vaibelchhe 10 ṭheuh chawi tura tih an ni bawk.

Nimina High Court-in Jayalalithaa-i thiam a chantir rual hian, a thurualpuia puh mi pathumte pawh hi an thubuai hlihsak an ni bawk.

Jaya-i ukil, B Kumar chuan eirua puhna thubuaiah hian fin­fiahna engmah a awm loh avangin a thubuai pawh tihtawpsak a ni ta tiin, "Tunah chuan Jayalalithaa-i hi Tamil Nadu Chief Minister ni leh tur­in daltu engmah a nei tawh lo," a ti.

AIADMK worker sang tel chuan a party hotu thiam chantir a ni tih an hriat hian an lawm nghal a, halmawite halin khawlaiah sweet te an sem a ni. Trial court-in thiam loh a chantir avanga Tamil Nadu Chief Minister atana Jaya-i thlaktu, O Panneerselvam pawh Jaya-i chenna inah kal nghalin, an party hruaitu lawmpuina hi a hlan a, party hruaitu dangte leh minister-te pawh Jaya-i chenna inah hian an kalkhawm a ni.

Trial court-in a thubuaia thiam loh a chantir avang hian nikum October thla khan Jaya-i hi CM a nihna aṭangin a bang a, hei bakah hian kum 10 chhung inthlana chuh thei lo tura hrem a ni bawk. Jail-ah dah ni mah se, October 17 khan Supreme Court thupekin bail-a chhuahtir a ni.

Eiruk thubuai hlihsak a nih rual hian, politics-a hrekna pawh a tawp nghal a, hei vang hian Karnataka High Court-in thiam a chantirna lehkha hi a hmuh hunah Jayalalithaa-i hi Tamil Nadu Chief Minister-ah dah leh nghal rin a ni a, kumin chhunga an state-in assembly inthlan an neih turah pawh a chuh thei dawn ta a ni.

High Court thutlukna siam hi Supreme Court-ah a appeal theih a, mahse Tamil Nadu-ah hian AIADMK hi rorel lai a nih avangin an appeal rin a ni lo. Vigilance Department leh eptu party, DMK chuan an duh chuan an appeal thei bawk.