Gadkari ban a nih hma chu Congress-in nawr zel tum

Comptroller and Auditor General report-in Union Surface Transport Minister, Nitin Gadkari-a chhungkaw company, Purti group hnenah sorkarin dik lo taka loan eng emaw zat a pe nia a tarlan chungchangah Congress party chuan minister hi ban turin a nawr chhunzawm zel.

Eptute'n Gadkari ban phuta rorel inkhawm an auhbuai avangin nimina Rajya Sabha inkhawm chu ṭum ruk tihtawp lailawk a ni a, Congress party chuan Gadkari hi a ban loh chuan rorel inkhawm la awm tur pawh tihbuai chhunzawm zel an tum thu an sawi. Rajya Sabha-ah hian Goods and Service Tax amendment bill ngaihtuah tur a awm a ni.

Party vice-president Rahul Gandhi-a'n Amethi biala food park project tihtawp a nih chungchang a sawi­chhuah, sorkar laipuiin politics-a inbumna nia a puh letnaah Congress party chuan thupha chawi turin sorkar a phut bawk.

Congress Party hian sorkar laipuiin land bill a siam dang­lam chu duh loin nimin khan lungawi lohna lantirin zing dar 6-ah Youth wing member-te chuan Prabhat Pheri (early morning walk) an huaihawt. Member-te hi MP-te chenna in hrang hrangah an kal a ni.

Land bill hi Lok Sabha-ah tlang tawh mah se, Rajya Sabha-ah pharh a la ni lo. Rajya Sabha-ah hian rorellai, NDA chuan majority a nei lo a, hei vang hian eptute'n an lo dan ngei rin a ni. NDA sorkar chuan hemi pumpelhna atan hian he bill hi Lok Sabha leh Rajya Sabha joint panel member hnenah thawn mai a tum a, joint panel rawt­na chu house pahnihah hian ngaihtuah leh a ni ang.