Dawood man turin Pakistan-in min thawhpui ṭha lo: Rajnath Singh

Union Home Minister Rajnath Singh chuan India-in man tuma a zawn mek, Dawood Ibrahim chu Pakistan a awm ngei tih information rintlak tak an dawng chungin, man a nih theihna tur hian Pakistan chuan a thawhpui lo tih a sawi.

Kum 1993-a Mumbai khawpuia bomb tipuaktua puh, Dawood Ibrahim awmna tak hi hriat a nih loh thu kar kaltaa Parliament inkhawmah sawi a ni a, hei hi eptute chuan na takin an bei let nghal a ni. Hemi hnu hian Rajnath Singh chuan Pakistan-ah a awm ngei tih thu rintlak an dawng a, India rama lak ngei tumin theihtawp an chhuah dawn tih a sawi leh a ni.

Nimina Lok Sabha inkhawmah he thu hi Union Home Minister chuan a sawichhuak a, "India chuan Pakistan hnenah Dawood awmna tak hi hrechhuak turin a nawr zel dawn a, man a nih theihna turin a ṭul ang apiang a ti ang," tiin a sawi.

Dawood hi India-in kum 2011-a fir­fiak man tura a zawn mi 50 list Pakistan hnena a pek zingah a tel.