Kawngpuia chetsualna thlengah nitin naupang 31 an thi : Ministry of Road Transport

Ministry of Road Transport and Highways-in report a tihchhuah thar ber aṭanga a lan dan chuan nikum chhung khan kawngpuia chetsualna/lirthei chetsualna thlengah India ramah nitin naupang 31 an thi anga chhut a ni.

Kum 2018 khan motor tlanna kawngpuiah chetsualna 1,51,417 a thleng a, nikum khan tlemin tlahniam hretin vawi 1,51,113 a thleng anga chhinchhiah a ni a, mahse nikum hmasa lam aiin nikum khan kawngpuia chetsualna thlengah hian naupang thi an tam zawk.

Road Transport ministry report aṭanga a lan dan chuan kum 2019 khan naupang 11,168-in kawngpuia chetsualna thlengah hian nunna an chan a, hei hi kum 2018 aiin 11.94%-in a tam zawk a ni. Naupang thihna thlenna hi chetsualna thleng zawng zawng 8% dawn a ni bawk.

Report-in a tarlan dan chuan Uttar Pradesh chu motor kawngpuia chetsualna thlenga naupang thi tamna ber niin kum 2019 khan naupang 2,388 an thi a, Tamil Nadu chuan dawtin 1,153 an thih laiin Punjab-ah chuan 979 an thi thung.

Madhya Pradesh-ah chuan naupang 867 kawngpuia chetsualna avangin an thi a, Bihar-ah 682 an thi bawk.

Kawngpuia chetsualna thleng laka naupang humhimna atan hian Motor Vehicle (Amendment) Act 2019 hnuaiah dan khauh tak siam a ni a, naupang zawng zawng chuan safety belt an hreng vek tur a ni tih te leh  child restraint system hman a ni tur a ni, tihte chu he dan hnuaiah hian a tel. 

Naupang kum li chin chung lamte chuan two wheeler-a an chuanin protective headgear an hmang ngei ngei tur a ni a, naupang chu a him lo a nih chuan a phurtu puitling chu mawhphurtu a ni bawk.