Railways-in Parliament canteen enkawl hna ITDC kutah a hlan dawn

Indian Railways chuan kum 52 chhung Parliament canteen enkawl hna a thawh chu November 15 hian India Tourism Development Corporation (ITDC) kutah a hlan tawh dawn. 

Lok Sabha Secretariat chuan kum 1968 aṭanga Parliament member-te ei tur lo buaipui saktu, North Railway Zone hnenah Parliament compound chu chhuahsan turin a hriattir a, thuneitu lamin Parliament House Estate-a catering unit chu ITDC  kutah November 15 aṭanga dah an duh tawh tih a hrilh. ITDC hian luxury five star Ashok Group of hotel a enkawl a ni.

Parliament canteen hian session tinin mi 5,000 vel ei tur a buaipui sak ṭhin. Canteen menu-ah hian food items 48 a awm. 17th Lok Sabha-ah Parliament House complex-a catering chungchang hi joint committee on food management-in a buaipui a, food committee erawh din a ni lo a, thutlukna chu Speaker Om Birla siam nia report a ni.