J&K Assembly-in Article 370 hman leh phutna resolution pass

Jammu and Kashmir Assembly session, nimin November 6, 2024-a neihah kum 2019, August thlaa sorkar laipuiin a tih tawp sak, J&K tana special status pekna Article 370 hman leh phutna resolution pass a ni.

National Conference (NC) senior leader leh deputy chief minister, Surinder Singh Choudhary chuan Article 370 hman a nih leh phutna resolution hi nimin khan house-ah pharhin, member-ten an pass a ni. Resolution-ah hian India sorkar leh Jammu and Kashmir-a thlan bik, mipui aiawhte chuan special status pek an nih leh theihna tura inbiakna neih an phut a ni. He Article hi J&K mipuite nihna, culture leh dikna chanvo venghimtu a ni tiin, tih tawpsak an ni chu an hrethiam lo hle tih pawh an sawi bawk.

Dy CM-in resolution a pharh hian BJP MLA te chuan an lo hnial a, ngaihtuah tur zinga telh a ni lo tiin an lo aubuai ve thung. BJP member-te hian resolution copy hi pawtthlerin, a them chu House laiah an paih. Rorellai member-te nen pawh an inaubuai nasa hle a ni.

Member-te inhnialbuaina karah, speaker Adul Rahim Rather chuan resolution chungchangah vote a la lui tawh a, an pass ta a ni. Mahse an la aubuai chhunzawm reng avangin vote lak hnuah a House hi minute 15 chhung tihtawp lailawk a ni zui bawk.

Helpawl mi pakhat thah a ni

Tualchhunga helpawl ten rawlrala chetna an chhunzawm mek chungin J&K sorkar hnuaia Assembly session hmasa ber chu chhunzawm zel a ni. Nimin khan helpawl leh sipai inkahna thlengah hel pakhat chu kah hlum a ni.

Nimina inkahna thlenna hmun hi Kashmir hmar lam, Bandhipor-ah a ni. Sipaite hian helpawl dapin, anti-militancy operation an neih chhunzawm reng a, November 5 khan hel an awm thu an dawn bawhzuiin Margi, Lolab leh Kupawara-ahte beihpui an thlak a, inbeihna thlengin silai pawh hmehpuah a ni bawk.