Ranthambore-ah keipui 25 an bo

Rajasthan-a Ranthambore National Park (RNP)-a keipui 75 awm zinga 25 te chu nikum chhung khan an chin hriat lohin an bo niin Rajasthan Chief Wildlife Warden, Pavan Kumar Upadhyay chuan Thawhṭanni khan a sawi.

He thil thleng hi kum khat chhunga keipui bo report tam ber ṭum niin, January 2019 - January 2022 chung khan keipui 13 chu Ranthambore aṭang hian an lo bo tawh bawk.

Wildlife department chuan keipui bo te chinchang ngaihven leh chhui chiang turin member pathum awmna committee a din a, anni hian record hrang hrangte zirchiangin, park official-te hna thawh danah thil fel tawk lo awm an hmuh chuan an chunga action la turin hma an la zui dawn a ni.

He team hian a tum ber chu keipui 14, kumin May 17 aṭanga September 30 inkara bo te hmuh let leh a ni. Pavan Kumar Upadhyay chuan,"Committee chuan report hi thla hnih chhungin an thehlut dawn a, heta ṭang hian kan hriat duh thil fel lo kan hmu thei ang. Tun hnai aṭangin kartin monitoring report ka la khawm tawh a, keipui bo ta te chu trap camera-ah pawh an in lan tawh ngai lo a ni. Hei hi ngaih pawimawh hle tur thil a ni, " a ti.

Park official-te chuan Ranthambore-a sakei pung hluai chuan ramri chin inchuh vanga insual buaina a thlen ṭhin niin an sawi. Sakei 75 awm zingah hian a note leh a la tuai deuh te a huam tel a, park square kilometer 900 bial lek chuan a dawl zo tawh meuh lo niin an sawi.

Wildlife Institue of India-in 2006-2014 chhunga zirchianna a neihah, park-ah hian sakei putling 40 chu him takin a enkawl theih niin a tarlang,