Jharkhand hi tribal ta a ni: CM Soren

Jharkhand chief minister Hemant Soren chuan an state chu tribal ta a ni a, tribal te hian ro an la rel dawn a ni, a ti.

Jharkhand Mukti Morcha (JMM) executive president ni bawk, CM Soren chuan BJP chu beiin, Hindu-Muslim inkara inhuatna thlentir tumah a puh a, an state-ah Hindu te dinhmun hlauhthawnawmin an awm lo tih a sawi. "BJP chuan CBI leh ED te fuihpawrhin, dik lo taka puhin jail-ah khung ka ni tawh. Mahse, Jharkhand ram leilung fa ka ni a, an hnuaiah ah ka kun dawn lo a, ka hlau bawk lo a ni" tiin a sawi.

West Singhbhum district-a Chotanagra khuaa vantlang inkhawm, Thawhlehnia a neihah Soren hian he thu hi a sawi a ni. "Jharkhand state hran nihna turin kan bei a, kan dikna atan kan bei zel bawk ang. Jharkhand hi tribal te ta a nih angin rorelna an chang ang," a ti. Jharkhand-ah hian 2011 chhiarpuiah khan mihring cheng 32,988,134 an awm a, heng zinga 26.21 percent (8,645,042) chu tribal an ni.

Member 81 awmna Jharkhand Legislative Assembly inthlan hi November 13 leh 20 ah te neih tura ruahman niin, November 23 ah vote chhiar a ni ang.