EC-in inthlan kaihhnawihah Rs vbc 558 man tawh

Election Commission of India(ECI) chuan Maharashtra leh Jharkhand-a assembly inthlan neih leh, state danga by-election neih kaihnawihah pawisa, thil sem ral tur(freebies), zu, damdawi, leh thir manto, Rs vbc 558 hu a man tawh.

Maharashtra bikah hian inthlan tur puan a nih hnu aṭangin Rs vbc 280 hu leh, Jharkhand huam chhungah Rs vbc 158 hu chu man a ni tawh a ni. An thil man zinga 40% hi vote zawnna atan an thil sem tur a nih thu ECI chuan a sawi.

Assembly inthlan neihna tur state pahniha an thil man hi kum 2019 assembly inthlan dawn a an thil man aiin let 3.5 in a tam zawk niin ECI chuan a tarlang. Chief Election Commissioner Ranjiv Kumar chuan dan kalha thil tih awm lo turin inthlan kaihhnawihah "zero tolerance" chu khauh taka kengkawh turin official-te chu a hrilh a ni. Pawl hrang hrang pawh zu, damdawi, pawisa fai, leh thil dang sem tur veng tura thawk ho turin a ngen bawk.

Assembly election leh by-election neihna turah hian information technology kaltlangin dan leh thupek kengkawhtute chuan thil awmdante ngun takin an thlithlai reng a, state ramrite pawh uluk taka ven an ni.

ECI hian inthlan neih hun tur a puan aṭangin cVigil App kaltlangin complaint 9,681 chinfel a nih tawh thu a sawi. Complaint chinfel ran lam hi 98% niin minutes 100 chhunga chinfel theih hi 83% a tling pha a ni.