BJP hruaituin Jaya-i thubuai appeal a tum
Tamil Nadu Chief Minister hlui leh AIADMK hotu, J Jayalalithaa-i chu a sum lakluh phu loha hausaa puhna, eiruk thubuaiah finfiahna rintlak a awm lo nia sawiin Karnataka High Court chuan fihlimah a lo puang tawh a, mahse BJP hruaitu Subramanian Swamy chuan court thutlukna hi ngaihtuah ṭha turin Supreme Court-ah appeal a tum thu a sawi.
Subramanian Swamy chuan hemi chungchang hi a twitter account-ah tarlangin, "Supreme Court-a JJ (J Jayalalithaa) thubuai hi ka appeal hunah, Karnataka High Court thutlukna siam hi thil chhut dik loh (arithmetic error) vang a ni tih ka finfiah ang. JJ hi Tamil Nadu CM-a lakluh hman a nih chuan a ban leh a ngai dawn a ni," a ti.
Swamy hi Jaya-i laka thubuai thehluttu a ni a, kum 1996 khan Jaya-i hi Chief Minister a nih lai, kum 1991-1996 chhug khan a lakluhna hriat si lohin nasa takin a hausakna hi a pung tih a sawi. DMK pawhin sorkarna a chan lai khan thubuai dang a siamsak bawk a, heng zingah hian chhan hriat loha cheng vaibelchhe 66.65 hu neia puhna pawh a tel a, he thubuaiah hian nikum September thla khan Bengaluru trial court chuan Jaya-i hi thiam loh a lo chantir tawh a ni. Mahse Jaya-i hian Karnataka High Court-ah a appeal a, HC hian eirua puhnaah finfiahna a awm lo tiin a thubuai hi a tihtawp sak ta a ni.
Karnataka sorkarin a ruat, Special Public Prosecutor (SPP) B V Acharya pawhin Jaya-i thiam chantirtu, special judge Justice Kumaraswamy-a'n Jaya-i DA chu a chhutsual a ni, a ti. Judge hian Jaya-i DA hi 8.12% angin a chhut a, a dik takah chuan 70% chuang daih a tling tih a sawi.
Acharya chuan court-in Jaya-i hausakna a chhut danah tihsual lian tak a awm thu sawiin, dik taka chhutin a sum lakluh zawng zawng hi bank loan Rs 24,17,31,274 paih hnuah pawh Rs 16,32,36,812 a la tling dawn a ni, a ti. Justice Kumaraswamy chuan Jaya-i hian loan Rs vbch 24 a la niin a sawi a, mahse a dik takah chuan Rs vbch 10 a ni tiin Acharya chuan a sawi bawk.
High Court thutlukna siam hi state sorkarin a appeal duh a nih chuan thil ṭha tak a nih tur thu a sawi. Appeal turin state sorkar hian ni 90 hun a nei.