Parliament joint committee-ah land bill

Sorkar laipuiin land bill a siam danglam, he Right to Fair Compensation and Transparency in Land Acquisition, Rehabilitation and Resettlement (Amendment) Second Bill-2015 chu rawtna zau zawk siam a nih theihna turin Parliament Joint Committee hnenah thlen a ni.

Land bill hi Lok Sabha-ah pass ni tawh mah se eptu lam leh, NDA hnuaia BJP thawhpui party ṭhenkhat chuan nasa taka sawiselin an dodal chhunzawm reng a ni. Sorkarin bill a siam danglam dan chu loneitute dinhmun ngaihthah sak a, sumdawng lian leh hausa zawkte tana ṭha tura siam danglam niin an sawi.

Bill hi Rajya Sabha-ah putluh a la ni lo a, Rajya Sabha-ah NDA hian majority a neih loh avangin an lo dan rin a ni. Hei vang hian sorkar chuan Joint Committee hnenah thlen phawt hi a tum ta a ni.

Land Bill siam danglam hi lo enfiah a, rawtna siamtu tur committee dinah hian Lok Sabha aṭangin member 20 leh Rajya Sabha aṭangin member 10 an awm a, Parliament Monsoon session-ah report an thehlut ang.