J&K Assembly-ah Article 370 vangin boruak sosang zel

Jammu and Kashmir Assembly session neih mekah, deputy chief minister Surinder Choudhary-a'n Thawhlehnia Article 370 hman leh phutna resolution a pharh an pass hnuah rorel inkhawm boruak chu eptu lamin an la chawkbuai chhunzawm zel. Nimin Zirtawpni thleng khan house chhungah an la inaubuai chhunzawm reng a ni.

Eptu pawl, BJP lam chuan resolution hi "dan phal loh" tia sawiin hnuhdawh an duh a, Nilaini aṭang khan rorel inkhawm hi an tibuai tawh a ni. House chhunga eptu pawl member-te mawi lo taka an chet zui vang leh, rorel theih loha midang aubuai leh kut thawh zawnga an khawsak zui avang hian speaker Abdul Rahim Rather chuan eptu pawl MLA 12 leh, Langate legislator Sheik Khurshid te chu house aṭangin a chhuah tir. Hemi hnu hian BJP MLA 11 dang chuan lungawi lohna lan tirin house an chhuahsan ve leh bawk.

BJP MLA-te hian Article 370 leh 35A hnuaia J&K special status pek leh phutna pass chu an duh loh zia lantir nan 'Pakistani agenda nahi chalega' tiin house chhungah hian an au bengchheng a ni. Leader of Opposition in thu a sawi laiin Awami Ittehad Party(AIP) leader, Sheikh Khursheed chuan Article 370 leh 35A din thar leh duhna lantirna a lo keng lang a, hei hi BJP MLA-te chuan a banner ken chu an tihchhiat sak a, an intibuai zui a ni. Buaina chhuah hnu hian house chu minute 15 chhung an chawl lailawk a ni.