Naupangte social media hman tam vangin Nu leh pa in dan khauh zawk siam phut

Australia chuan an ramah naupang kum 16 hnuai lam tan nghawng ṭha lo a neih avangin social media hman an khap tur thu a puang a, India ramah pawh tun hnaia survey neihah nu leh pa tam takin hetiang tlukpui dan ṭha tak hi sorkarin a duan ve an duh thu an tarlang.

LocalCircles in survey a neihah, India rama nu leh pa tam zawk chuan kum 18 hnuailam, social media peng hrang hrang hmangte nihna venhim na tur, nu leh pa hraitpui loha an khawih lohna tur dan duan ni ve se an duh tih an sawi. Zirchianna neihah hian naupang, social media khawih ṭhin te chuan a ngawl an vei nasa hle a, social media mai bakah gaming platform hrang hrang pawh a tel.

Naupang social media leh gaming platform hmang nasaa nghawng ṭha lo tak a neih dan te chu sawiin, an mizia danglamin an thinchhia a, dawhtheihna an tlak chham nasat bakah an tha a tho lo in an zawi hle niin LocalCircles zirchianna hian a tarlang a ni.

Survey an neihna, nu leh pa zinga 10% chuan an fa, kum 9-17 inkarte chuan nitin online nan darkar ruk chuang an hmang tiin, a dang 37% pawhin darkar thum aṭanga darkar ruk an hman thu an sawi a, 39 % in darkar thum an fa ten an hman thu an sawi ve bawk.

He an zirchianna aṭang hian India rama nu leh pa te chuan Australia hmalakna engah hian, India ramah ngei pawh naupang kum 16 hnuai lam tan social media khapna dan siam a ṭul hle nia an ngaih thu LocalCircles dintu, Sachin Taparia chuan a sawi.