Counter-terrorism policy hman theih thuai dawn: Amit Shah

Union home minister Amit Shah chuan Ningania Anti-terror Conferance 2024 a hmanpuinaah Ministry of Home Affairs hnuaiah National Counter-terrorism policy and strategy chu a rang thei ang bera peihfel a nih tur thu a sawi.

Amit Shah chuan, "Hmalakna thar kalpui mek niin ministry chuan terrorism, terrorist leh terrorist kaihhnawih thil hrim hrim tih bo theihna turin National Counter Terrorism Policy and Strategy hman theih a ni thuai dawn" tiin a sawi a ni. Agency hrang hrangte chu tunlai thiamna hmang ṭangkai a, inthuam chak a,ruahmanna mumal tak nena khawvel huap helpawl hrang hrang 'lang lo lam leh ramrikham nei lo' te chu bei let tura an inpuahchah a ṭul hle tih a sawi bawk.

Shah chuan India ramah helpawl te chetna chuan hniam lam a pan thu sawiin, 2014 aṭang khan 70% laiin a tlahniam tawh a ni, a ti. Heihi state leh central sorkar ten ṭangruala an beihnain a nghawng a nih thu sawiin, Jammu and Kashmir leh Naxal hel hluarna bakah hmarchhak bial chhungah kum 10 chhung in nasa taka hmasawnna a awm thu a tarlang bawk a ni.

Helpawl nena inbeihnaah police mi leh sa 36,000 in nunna an chan tawh thu Home Minister chuan a sawi a, conference-a tel state police force aiawhte chu a ṭulna apiangah Unlawful Activities(prevention) Act hmang turin a chah. "Indepedence kan neih aṭanga kum 75-a liam hnu, vawiin thlengin police mi leh sa 36,468 chuan an hna thawhna hmunah nunna an chan tawh a, heng mite hi tualchhung himna tur leh ramri himna tur atana inpete an ni," a ti.