Rajasthan-ah rel kawng enchhinna tur thawk mek

Rel kawng enchhinna tur, test track hmasa ber chu Rajasthan-ah siam hna thawh mek a ni a, hei hi rel kein kawnga a tlan dante enchhin leh zirchianna tur atana duan a ni.

Test track an siam hi December 2025 hmaa zawh tura ruahman a ni. Research Designs and Standards Organization(RDSO) hnuaiah hian hna hi thawh hniha kalpui niin, a a thawh khatna tur chu December 2018 khan pawm a ni a, a thawh hnihna hi November 2021 khan pawm a ni bawk. He project thawhna atan hian Rs vbc 820 ruahman a ni.

He hna thawh mek hi rel leh a kawng siam chungchanga hmasawnna tur leh infrastructure tih chak leh hmasawnna kawng pawimawh tak a ni. Test track hi km 60 a thui niin kawng kawi te siam tel a ni bawk. Kawng kawi an siam hi rel tlan dan ti muang chuang loa chak taka a tlan theih dan tur enchhinna tur atana duan a ni a, he kawngah hian bullet train te pawh 230 kmph a chaka enchhin theih tura duan a ni bawk.

Indian Railway-a Research Designs and Standards Organization(RDSO) hnuaia rel kawng siam hi rel in bungrua leh khualzin te him taka a phurh theih nana duan niin, tuna an siam lai mek hi Jodhpur Division huam chhunga Deedwana district a awm a ni. He hna hi Indian Railways-in hma a sawnna tur mellung pawimawh tak, hmasawnna lan tirtu tur niin kawng engkima a him thei ang ber tura ruahmanna fel taka siam a ni.

Rel kawng an siam hian lei dawh lian pasarih leh lei dawh te deuh 129 a tan tlang bakah station pali Gudha, Jabdinagar, Nawan, leh Mithadi te a paltlang dawn a, tunah hian km 27 a thui chu zawhfel tawh a ni. Railways official-te chuan hma hun zelah pawh high-speed, semi-high-speed, leh metro train te pawh he lai kawngah hian enchhin zel tura ruahman a nih thu an tarlang.