India leh China-in inremna an ziak
China rama cham mek, Prime Minister Narendra Modi leh China Premier Li Keqiang-te chu nimin khan Bejing-a Great Hall of People-ah an inkawm a, ram pahnihte hian thawhdunna tur, inremna 24 an ziakfel nghal.
Thawhdunna tura inremna an ziah hi dollar tluklehdingawn 10 hu vel a ni a, inremna an ziah zingah hian Chengdu, China leh Chennai, India-a Consulate-General dinna tur te, Indian Railways leh China National Railways-te thawhdunna tur zau zawk siamna te, Space Cooperation Outline bakah education exchange program buatsaihna turte pawh a tel.
China Premier nena inbiakna an neih hmain PM Modi hi Beijing-a Great Hall of People-ah a lawmna hun hman a ni a, guard of honour pek a ni. Inbiakna zawh hnua chanchin thar lakhawmtute a kawmnaah, China ram hruaitu nen chuan inbiakna hlawhtling tak an nei tih a sawi a, hemi rual hian ram pahnihte'n inpawhna nghet tak an neih theihna daltu thil ṭhenkhat la awmte chu ngaihtuah nawn tura a duh thu a sawi.
Nimin vek khan PM Modi hian Beijing-a Tsinghua university zirlaite hmaah thu a sawi a, India leh China-in thawhdunna ṭha tak an neih chuan, Asia chu khawvel huapin a hlawhtling dawn a ni, a ti. Zirlaite nen hian zawhna leh chhanna hunte an hmangho nghal bawk.