Jaya-in May 22-ah AIADMK MLA meeting a ko

Eiruk thubuai hlihsak tak, Tamil Nadu Chief Minister hlui leh AIADMK hotu lu ber, J Jayalalithaa-i chuan May 22, zing dar 7 hian Chennai-a an party headquarters-ah party MLA meeting a ko.

Tamil Nadu-a rorellai, AIADMK hian MLA 151 a nei a, MLA-te hi an vaiin meeting-ah hian tel vek tura hriattir an nih thu party thuchhuah chuan a tarlang.

Karnataka High Court-in a sum lakluh phu loa hausaa puhna thubuai a tihtawp sak hnuah, Jayalalithaa hi mipui hmuhah a la inlan tam lo hle. May 22-a meeting neih hunah hian legislature party hruaitu atana thlang ṭha lehin, hemi hnu hian Tamil Nadu Chief Minister-ah lakluh leh nghal a nih rin a ni.

Jayalalithaa-in hi Tamil Nadu Chief Minister a nih lai, kum 1991-96 chhunga a sum lakluh phu loa hausaa puhin, eiruk thubuai siamsak a ni a, Bengaluru trial court-in thiam loh chantirin kum li tang tur leh cheng vaibelchhe 100 chawi turin a hrem a, mahse Karnataka High Court-a a appeal hnuah HC hian an puhnate hi finfiahna ṭha a awm lo tiin a hlihsak ta a ni. A rual hian a thurualpui nia puh, midang pathumte thubuai pawh hlihsak nghal an ni.