Parliament budget session-ah bill 24 pass a ni
Parliament budget session chu Nilaini khan a zo a, session hi thawh hniha neih niin thla thum chuang zet a awh. Session chhung hian ngaihven hlawh tak, land acquisition bill chungchangah sorkar leh eptu lamte an innawr na hle a, he bill hi tihfel hman loin joint committee kutah hlan ni mah se, bill dang 24 erawh pass fel hman a ni.
February 23-a ṭan, Parliament budget session hi kum 15 chhunga rorel inkhawm neih ṭhat ber zingah a tel pha a, Lok Sabha-ah chuan schedule time aṭangin 123% chhung hna thawh a ni a, Rajya Sabha-ah pawh hnathawh hun chhung hi 101% a tling pha a ni. Question Hour pawh zawhna a lut ṭha a, hetihlai hian money bill chu tun ṭum session bikah hian kum thum chhunga sawiho aia tam an sawiho thung.
Rajya Sabha-ah chuan scheduled question zinga 32% chu ṭawngkaa chhan a ni a, hei hi kum 10 chhunga chhan a nih tam ber ṭum a ni. Lok Sabha-ah pawh tawngkaa zawhna chhan hi 22% a awm bawk.
Tun ṭum session hi kum 15 chhunga recorded vote hmanga bill pass tam ber ṭum a ni. Dan tlangpui chuan Parliament-ah hian bill hi voice vote hmanga pass a ni ṭhin a, mahse tun tuma 16th Lok Sabha session-ah hian bill 17% chu recorded vote hmanga pass a ni.
Kum 47 kalta chhungin Parliament in hnihah hian private member bill hi pass a la ni ngai lo. Mahse kumin session-ah chuan Tirucha Siva-a put luh, transgender-te equal rights pekna tur private member bill chu Rajya Sabha-ah lungrual taka pass a ni.
Parliament in hnihte hian lungrual takin Bangladesh nena ramri buaina chinfelna tur, land boundary agreement chu an pass a, hei hi Constitution amendment bill 100-na chiah a ni.
Hun rei tak tihkhawtlai tawh bill eng emaw zat pass a ni a, heng zingah hian coal mines bill, insurance laws amendment bill, mines and mineral amendment bill leh black money bill te a tel a, Goods and Services Tax bill chu Rajya Sabha select committee ngaihtuah tura dah a ni bawk. Parliamentary Affairs Minister M Venkaiah Naidu chuan eptute'n rorel inkhawm tihbuai tum ṭhin mah se, hlawhtling taka rorel inkhawm an nei thei chu lawmawm a tih thu a sawi.