Ni thum cham turin PM-in China a tlawh

Prime Minister Narendra Modi chu ni thum cham turin nimin khan China-ah a zin a, China President Xi Jinping-a khua, Xi'an a tlawh nghal.

China rama a cham chhungin PM Modi leh China President Xi-te hian ram pahnih inlaichinna ṭha zawk siam dan turte an sawidun dawn a, ramri chungchanga buaina awm mek leh, China-in Pakistan-occupied-Kashmir (PoK) a infrastructure project siam a tumte pawh an sawidun ang. Hei bakah hian China-in Arunachal Pradesh state mite tana visa pangngai aia stapled visa a pek chungchang pawh PM hian a sawichhuah rin a ni bawk.

Modi hian nimin khan China rama hmun hmingthang tak, Terracotta Warriors museum a tlawh nghal a, he hmunah hian China lal hmasa ber, Qin Shi Huang-a sipaite lim ker tam tham tak dah a ni. Hemi hnu hian Shaanxi province-a President Xi-te khua, Xi'an-a Buddhist Dashang temple a tlawh leh a ni. He khuaah hian President Xi-a'n a lo dawngsawng a, Shaanxi Guest House-ah meting an nei nghalin, tlai lamah Modi hian Beijing lam a pan leh nghal.

Beijing-ah hian China Prime Minister Li Keqiang nen vawiinah meeting an nei ang a, meeting zawhah Shanghai panin hetah hian sumdawng aiawhte hmaah thu a sawi ang a, Fudan University-a Mahatma Gandhi chair hmasa ber a hawng ang. Sanghai-ah hian India mi awmte nen hun an hmangho dawn bawk a ni.

China-a Modi cham chhungin ram pahnihte hian sumdawnna lama thawhdunna tur inremna thuthlung 20 vel tal an ziahfel beisei a ni. Insumdawn tawnna kawnga ram pahnihte inkhuangrual loh dan pawh sawiho a ni bawk ang.

PM hi National Security Advisor Ajit Doval, Foreign Secretary S Jaishankar leh senior official-te'n an ṭawiawm.